6 di Mai 1976, il Teremot in Friûl
"PRIMA LE CASE E POI LE CHIESE” STORIE DI UN SLOGAN ROBÂT
In cheste mê apologjie o ai sielt di dâ la preference ai miei rapuarts personâi cu la istituzion e in particolâr cu la autoritât diocesane rapresentade dal vescul. Par chel o tâs chei fats che a àn interessade dute la comunitât cristiane e civîl. O, se o 'int feveli, o met in lûs chei aspiets che jo ju ai vivûts in prime persone. Chest no lu fâs naturalmentri par sintîmi o par metimi al centri dai fats, ma par dâ il gno contribût personâl di leture e di valutazion. L’unic servizi verementri util che o pues dâ in robis plui grandis di me. Cun chest criteri o salti la tragjedie dal taramot e dut ce che il vescul e la curie a àn fat, no àn fat o a podevin fâ. E je stade une esperience traumatiche par ducj e nissun nol jere preparât. Si pues dî duncje, a distance di timp, che si à fate une figure discrete, o disarès splendide, almancul dal pont di viste assistenziâl e caritatîf. Cun in plui la presince eroiche dai predis sul puest, a spartî dolôrs e pôris insiemi cu la lôr int. Ce che al è mancjât, secont me, e je stade la cjarie profetiche che la glesie e varès vût di puartâ inte grande vore e scomesse de ricostruzion. Soredut domandant un stamp di ricostruzion che al privilegjàs lis realtâts plui bandonadis e i aspiets tipics di un mont che, se al murive, o murivin ancje nô. Al è ce che al è stât domandât cun clarece ancje te senblee dai laics dal ’77. Invezit si à preferît, in linie cu la tradizion catoliche, fâ tant, judâ la int, confuartântle, vaî cun jê: dute robe meretorie. Ma no sarès stât mancul meretori judâle a vierzi i voi e a judâsi par un progjet globâl so, alternatîf a chel cence culture e cence anime dât dongje dal aparât public. Nancje in cjase sô, tal fâ sù lis glesiis, la istituzion glesiastiche no je stade vonde libare, fuarte, alternative, profetiche. Il câs de glesie–astronâf di Maian, insieme cun altris “perlis”, al restarâ come testemoneance vergognose di sieltis scandalosis. Di dut chest flagjel al è restât, vie pe Italie, il coragjo dal vescul che si rimpinave su lis maseriis a confuartâ e la grande idee che al à vude di domandâ che si fasessin «prima le case e poi le chiese». No son peraulis che si sintilis ogni dì e tant mancul su la bocje di un vescul. Ma ise lade propit cussì? Che chestis peraulis a setin saltadis fûr dal ambient clericâl e je vere. Che lis vedi ditis il vescul o la part plui raprentative de glesie furlane no je vere. Anzit, al è vêr il contrari. Chest o pues dîlu parcè che il document «Ai furlans che a crodin» lu ai dât dongje jo insieme cun pre Josef Cjargnel e pre Laurinç Dentesan te canoniche di Luincis di domenie dopomisdì ai 9 di Mai, juste tre dîs dopo dal sisme. Lu vin puartât jù a Udin pe assemblee che il vescul al veve convocade ai 11 di Mai. Jal vin fat viodi a pre Checo a Montenârs, che si è dit dacuardi ma al veve tal cjâf i siei berdeis di cjase e di paîs, e a pre Pauli Varut, che al à dit che a jerin cjacaris astratis. «Daitnus i bêçs daurman e nô o tornìn a fâ sù il Friûl!» al à dit. Une robe biele e forsit vere ma impussibil, soredut in chel moment. Si che duncje o vin batût a machine il nestri scrit in cjase di pre Tunin Cjapielâr a Glemone e o vin domandât di leilu denant dai predis. Stant che i autôrs principâi dal document a jerin za schedâts te crepe dal predessam come politicants, o vin cirût di fâ i furbos mandant sul palc une anime semplice e ingjenue come pre Pieri Degan, prevost di Zui. Al è lât sù e al à tacât a lei ce che nus pareve che une glesie taramotade e scugnìs dî in chel moment par dâi une man ancje culturâl e spirituâl al popul furlan. I predis lu àn lassât lei par un pâr di minûts. Cuant che al à dit: «O pratindin di jessi nô furlans...», dute la conclave e à tacât a fâ un casin dal diaul, ofindude che ancje intun moment come chel no pierdessin il vizi di fâ politiche, impen di vaî i muarts. I àn tirât vie il microfon e lu àn fat dismontâ dal palc invelenâts. Alore il vescul, che nol veve la fuarce di inponi ae assemblee che si lassàs lei ce che ognidun al veve prontât, al à dit che i predis a jerin ancjemò sotsore e al jere miei lassâ stâ ogni resonament e strenzisi dongje dai predis che a vevin soterade tante int. E par fâ la robe ancjemò plui incorade, al à clamât sù i predis dai paîs taramotâts «seont il numar dai muarts che a vevin vût». Mi visi ancjemò di chescj puars predis, bogns, che a lavin sù a contâ: «Jo a 'nd ai vûts trente»; «Jo a 'nd ai vûts cincuante»; «Jo a 'nd ai vûts plui di ducj» e vie indevant. Une robe penose. E il document programatic? Fortune che fûr dal teatri dal 'seminari a jerin i gjornaliscj, in spiete di ce che a proponevin i predis. Cussì, intant che e sfilave sul palc la prucision dai predis che a vevin fat funerâi, pre Laurinç Dentesan al à let il nestri document a la stampe, che dopo lu à trasmitût in lunc e in larc. O sai che a Milan a àn fate une cunvigne in merit, stant che e jere la prime vôs clare intun moment di comprensibil disorientament. E Diu al à volût che ancjemò une volte a fossin i solits eretics a salvâ la muse di chê istituzion che no veve vude nancje la creance di scoltâ ce che, di predis e di furlans, o proponevin. Biel che la stampe taliane e foreste e à vût fevelât a lunc di chest “pronunciament”, La Vite Catoliche, a furce di vitis pôc catolichis, lu à ripurtât dôs setemanis dopo, intun cjantonut che nissun nol leve a lei. Nemo propheta in patria in timps normâi. Figurìnsi intun taramot! O crôt però che e vali la pene di ripuartâ, cumò che la robe e je finide, e finide avonde ben, ce che nô, te nestre ingjenuitât e te nestre straordinarie (par chei agns e par chei moments) voie di fâ, o proponevin, come glesie, a dute la comunitât furlane e al stât. Cualchi toc lu riten profetic. E chest lu dîs cussient che Diu, come che al à profetât midiant de musse di Balaam, al pues fâ bielis robis ancje midiant dai puars mus de glesie furlane.
APOLOGJE pro manuscripto, pre Antoni Beline
